10:23 • 30.10.17
Բարզանին Քրդստանի ղեկավարի պաշտոնից հեռանալու մասին հայտարարությունից հետո նշել է, որ Քրդստանը մեծ դավաճանություն է վերապրել Բաղդադի կողմից, ինչպես նաև քննադատել է ԱՄՆ-ին, որը միջամտություն ցույց չտվեց քրդական դիրքերի վրա իրաքյան բանակի և շիական «Հաշդի Շաբի» խմբավորման զինյալների գրոհի ժամանակ:
Ինչպես փոխանցում է diken.com.tr-ը, ըստ Բարզանիի՝ «Հաշդի Շաբի»-ն և իրաքյան բանակը քրդերի վրա հարձակվեցին հենց ամերիկյան զենքով:
«Նրանց աչքի առաջ և նրանց իսկ զենքով Իրաքի բանակն ու «Հաշդի Շաբի»-ն հարձակվեցին մեզ վրա, սակայն ԱՄՆ-ն ինչո՞ւ ձայն չհանեց: Այս հարցերը պետք է բարձրացվեն, քանի որ նրանց զենքով է մեր «փեշմերգան» նահատակվել», — հայտարարել է Բարզանին:
Քրդստանի ղեկավարը նշել է, որ հոկտեմբերի 16-ի Քիրքուքի վրա գրոհը Քրդստանի դեմ մեծ դավաճանություն էր Բաղդադի կողմից, «որը նախընտրեց հստակ կրոնական ուղղության հետևորդ դաշնակցի կողմն անցնել»:
«Եթե հանրաքվեն չլիներ էլ՝ հարձակվելու էին մեզ վրա: Նրանք չէին եկել Իրաքի սահմանադրությունը պաշտպանելու, նրանք եկել էին քրդերի կամքը կոտրելու, «Հաշդի Շաբի»-ի հարձակումները ստիպեցին մեզ պատերազմի մեջ ներքաշվել», — ասել է Բարզանին:
Հիշեցնենք, որ սեպտեմբերի 25-ին Իրաքյան Քրդստանում տեղի ունեցած անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Հանրաքվեին մասնակցել է ընտրողների 72,16 տոկոսը:
Օրեր առաջ Իրաքի ուժերը սկսել էին երկրի հյուսիսում գտնվող թուրքմեններով, արաբներով և քրդերով բնակեցված Քիրքուք շրջանի վրա գրոհը, որն Իրաքյան Քրդստանի ու Իրաքի միջև վիճելի տարածքներից մեկն է համարվում: Կարճ ժամանակ անց իրաքյան բանակին հաջողվել է վերահսկողություն սահմանել Քիրքուքի օդանավակայանի և կարևոր նավթահանքերի օբյեկտների նկատմամբ, իսկ քրդական «փեշմերգան» զանգվածայնորեն նահանջել է զբաղեցրած դիրքերից:
