ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Ֆրանսիայի Ազգային ժողովի պատգամավոր Վալերի Բուայեն խնդրել է Սենատի նախագահ Ժերար Լարշերին ստեղծել Հայոց ցեղասպանության ժխտողականությունը պատժելու հարցով աշխատանքային խումբ: «Արմենպրես»-ի հաղորդմամբ՝ Բուայեն այս մասին գրել է «Ֆեյսբուք»-իր էջում՝ կից տեղադրելով Ծիծեռնակաբերդից արված լուսանկար՝ գործընկերների հետ:
«Իմ մեկնելուց առաջ ես խնդրեցի Սենատի խոսնակ Ժերար Լարշերին ստեղծել աշխատանքային խումբ `Հայոց ցեղասպանության ժխտողականությունը պատժելու համար»,-նշել է պատգամավորը:
Նա շեշտել է, որ այսօր պետք է լիովին վերանայել ժխտողականությունը: «Ժխտողականությունն ցեղասպանության հանցագործությունից պակաս չէ: Ինչպե՞ս իրականում պայքարել ցեղասպանության դեմ ՝ առանց պայքարելու նաև ժխտողականության դեմ»,-նկատել է Բուայեն:
Օսմանյան կայսրության կողմից 1915 թվականին հայերի նկատմամբ իրականացված ցեղասպանությունը 20-րդ դարասկզբի մեծագույն ոճրագործությունն է: Աշխարհասփյուռ հայությունը նշում է Հայոց ցեղասպանության 106-րդ տարելիցը: Ցեղասպանությունը ճանաչել և դատապարտել է մոտ երեք տասնյակ պետություն՝ Արգենտինան, Ավստրիան, Բելգիան, Բոլիվիան, Բրազիլիան, Կանադան, Չիլին, Կիպրոսը, Չեխիայի Հանրապետությունը, Դանիան, Գերմանիան, Հունաստանը, Իտալիան, Լիտվան, Լյուքսեմբուրգը, Նիդերլանդները, Պարագվայը, Լեհաստանը, Պորտուգալիան, Ռումինիան, Ռուսաստանը, Սիրիան, Սլովակիան, Շվեդիան, Շվեյցարիան, Ուրուգվայը, Ֆրանսիան, միջազգային հեղինակավոր կազմակերպություններ:
